Энэ зуны загварын чиг хандлагыг сонирхохуй

Зуны халуун өдрүүдэд өмсөх нимгэн хувцсаа авч амжсан уу?

2015 оны хавар зуны дэлхийн загварын долоо хоногууд дуусч, дизайнерууд энэ зуны загварын чиг хандлагыг тодорхойллоо. Ямар өнгө загвартай хувцас сонгохоо мэдэхгүй байвал доорх зөвлөгөөнөөс санаа аваарай.

Гэхдээ та моод дагагч биш өөрт зохисон, биеийн галбирын сайхан хэсгүүдийг илтгэсэн хувцас сонгох нь юу юунаас чухал гэдгийг бүү мартаарай.

Бүсгүйчүүдэд зөвлөх нь

Далий загвартай хувцас

Бусад жилүүдтэй харьцуулахад энэ зун далий, тэгш хэмгүй загвартай хувцаснууд моодонд орж байна. Ажил хэрэгч хувцсанд ч ийм чиг хандлага ажиглагдах болжээ. Жишээ нь далий хормойтой банзал, нэг мөртэй эсвэл нэг ханцуйтай цамц байж болох юм.

Цэцгэн хээ

Цэцгэн хээтэй хувцас энэ жилийн хувьд ч моодноос гарсангүй. Романтик стиль гэгддэг төрөл бүрийн өнгө алагласан цэцгэн хээ нь таны эмэгтэйлэг төрхийг илтгэж, ялдам харагдуулах болно.

Газар шүргэсэн урт даашинз

2015 оны зуныг урт даашинзгүйгээр төсөөлөшгүй биз ээ. Газар шүргэсэн урт даашинз нэг бус удаа трэнд болж байна. Зуны даашинзыг ихэвчлэн хөнгөхөн, гэрэлтсэн, цайвар өнгийн материалаар хийдэг бөгөөд энэ нь эмэгтэй хүний уян налархай биеийг улам тодотгон харуулдаг.

Бага зэрэг гэрэлтдэг материал бүхий даашинзыг өөртөө итгэлтэй, бие галбирынхаа сайхныг бусдад харуулахаас санаа зовдоггүй бүсгүйчүүд сонгох нь олонтаа.

Торон хувцас

Загвар зохион бүтээгчид торон, цоолбортой материалын тусламжтай загварууддаа тансаг хэв маяг оруулдаг. Торон материал нь арьс чөлөөтэй амьсгалах боломж олгодог бөгөөд түүний зэрэгцээ дэгжин эмэгтэйлэг харагдуулна. Торон материалтай хувцас сонгохдоо цагаан эсвэл арьсны өнгөтэйг сонговол таны бие цогцсыг улам гайхалтай харагдуулах болно.

Комбинзон буюу үргэлж өмсгөл

2015 оны гол трэнд бол конбинзон буюу үргэлж өмсгөл /англиар jumpsuit/. Өмсөхөд эвтэйхэн бас биеийн галбирыг сайхан харагдуулдаг энэхүү өмсгөл нь хэдэн жилийн өмнөөс л трэнд болсон хэвээр. Үргэлж өмсгөлийг дизайнерууд ихэвчлэн хөнгөхөн, нимгэн материалаар урладаг.

Богино өмд

Дизайнерууд энэ зун төрөл бүрийн хэлбэр загвартай шортууд санал болгож байгаа ч шортны уртад төдийлөн ач холбогдол өгсөнгүй. Учир нь таны хүссэнээр хэт богино эсвэл өвдгөө хүрсэн урттай байх боломжтой гэнэ. Шорт үргэлж зуны хувцасны гол сонголтын нэг байсаар ирсэн. Гэхдээ энэ зун өндөр суудалтай шорт зонхилж байна.

Мэдээж та өөрийн бие галбиртаа тохируулан сонгох ёстой гэдгийг үргэлж санах хэрэгтэй. Учир нь моод даган тохирохгүй хувцас өмсвөл түүнээс ч аймшигтай зүйл болохыг бүү мартаарай.

Даавуун цамц

Энэ зуны гол өнгө бол цагаан цайвар. Тэр тусмаа сул, чөлөөт загвартай цагаан сорочкан цамц бол хэзээд хоцрогдохгүй сонголт бөгөөд хэдэн настай эмэгтэйд ч гайхалтай зохидог юм.

Цагаан цамц ямар ч банзал, өмд шорт, жинс, нэг үгээр хэлэхэд бүхий л зүйлтэй хослуулан өмсөхөд гайхалтай зохицдог билээ.

Судалтай хувцас

Энэ зуны бас нэгэн трэнд бол судалтай цамц, даашинз, банзал. Хэрвээ таны биеийн галбир доошоо харсан гурвалжин ▼ хэлбэртэй бол та хөндлөн судалтай цамц өмсөөд хэрэггүй. Учир нь таны мөр болон цээжийг улам өргөн харагдуулна. Эсрэгээрээ танд хөндлөн судалтай банзал эсвэл өмд илүү тохиромжтой. Хэрвээ та алиман хэлбэртэй биетэй бол судал нь гэдэс хэсэгтээ таарсан хувцас бүү сонгоорой.

Та элсэн цаг ⏳, эсвэл лийр хэлбэрийн биетэй бол хөндлөн судалтай хувцас сонгохгүй байхыг зөвлөж байна.

Урт банзал

Нар шарсан халуун өдөр тод өнгөтэй газар шүргэм урт банзал таныг ихэмсэг харагдуулна. Эсвэл элдэв зураггүй, цулгуй хэрнээ цайвар өнгөтэй банзлыг та нимгэн сорочкан цамц дор өмсөөд үзээрэй. Гайхалтай харагдах болно.

Гутал

Зуны углааш, сандалийн хувьд энэ жил өмнөх жилүүдэд трэнд болж байснаас төдийлөн ялгаа гарсангүй. Урьдын адил бидний нэрлэж заншсанаар балерина буюу намхан ултай гутал онц гойд тоноглолгүй ч жижиг чимэглэлтэйгээр гарсан нь анхаарал татаж байна. Мөн жинс, өмд, урт банзалны доор өмсөхөд тохиромжтой даавуун материалтай гутлууд ч энэ жил илүүтэй давамгайлах боллоо. Бүсгүйчүүдийг цэгцтэй, ялдам харагдуулах нарийн оломтой өндөр өсгийтийг ч мартах ёсгүй ээ.