Энэ удаагийн ярилцлагын зочин бол Н.Анужин. Тэрбээр 20 настай бөгөөд бодибилдинг фитнессийн олон улсын өндөр зэрэглэлийн НЭЭЛТТЭЙ ТЭМЦЭЭНЭЭС хос алтан медаль хүртсэн юм. Ингээд уншигч танд Н.Анужингийн ярилцлагыг хүргэж байна.
-Юун түрүүнд хос алтан медаль хүртсэнд баяр хүргэе. Танаас гадна Монголын хоёр тамирчин шагнал хүртсэн гэж мэдэх юм байна. Тэмцээний талаар мэдээлэл өгнө үү?
-Баярлалаа. Би Хонконгод болсон олон улсын нээлттэй тэмцээнд оролцоод ирлээ. Мөн энэ үеэр болсон мэргэжлийн тамирчдын тэмцээнд манай улсаас Э.Ганзориг, Ц.Баянхүү ах нар маань оролцож шагнал хүртсэн. Бид Монголынхоо нэрийг олон улсад гаргаж чадсандаа баяртай байна.
-Таны оролцсон төрөлд хэчнээн бүсгүй өрсөлдсөн бэ?
-Нэг ангилалд 15 өрсөлдөгч тамирчин байсан. Миний хувьд “Модель физик”, “Мисс бикини” гэсэн ангилалд оролцсон.
-Энэ спортоор хэдэн жил хичээллэж байна. Яагаад энэ спортыг сонирхох болсон юм бэ?
-Би залуу тамирчин. Анх фитнесст жингээ хасах зорилгоор явсан. Тэгээд сүүлдээ ийм сайхан спорт юм байна гэж дурлаад бэлтгэлээ сайн хийж тамирчин болсон. Фитнессээр хичээллээд хоёр жил болж байгаа. Яг мэргэжлийн төвшинд бэлтгэл хийж эхлээд нэг жил болох гэж байна.
-Үүгээр хичээллэснээс хойш найз нөхөд, гэр бүлийнхнээс тань тантай нэгдсэн хүн бий юү?
-Ойр дотнын хүмүүс фитнессээр хичээллэж, эрүүл хооллодог болсон шүү. /инээв/
-Анх жингээ хасах зорилгоор энэ спортод хөл тавьсан гэлээ. Нууц биш бол фитнессээр хичээллэхээс өмнө хэдэн кг жинтэй байсан бэ?
-Фитнессээр хичээллээд биеийн жингээсээ 10кг-ыг хассан. Гэхдээ булчингийн массаа нэмээд дээр нь өөхөө хасах чинь тийм ч амар зүйл биш юм билээ. Одоо бол булчингийн массаа нэмэх тал дээр илүү анхаарч байгаа.
-Хэдий хугацаанд 10 кг-ыг хаясан юм бэ?
-Фитнессээр нэг сар хичээллээд 10 кг хаясан.
-Хүмүүс фитнессээр хичээллэх нь нэлээд үнэтэй спорт гэдэг юм билээ. Хоол хүнс, уураг, бэлдмэл, тос түрхлэг гээд мөнгө их зардаг гэсэн. Тэгсэн ч гэсэн улам дурлаад байх юм уу?
-Мөнгө зардаг спорт гэдэг нь үнэн. Гэр бүлийнхэн болон “Power nutrition sponsor” байгууллага маань дэмжлэг маш сайн үзүүлдэг болохоор тийм ч хүндрэлтэй байдаггүй.
-Мөн бодибилдингийн тамирчид уралдаан, тэмцээнд оролцохдоо маш их зардал гаргадаг. Сая болсон тэмцээнд оролцоход тань ямар нэг байгууллага дэмжсэн үү?
-Тийм. Сая болсон тэмцээнд оролцохдоо тамирчид 100 өөрсдөө зардлаа гаргаж явсан. Дунджаар нэг тамирчин гурван сая төгрөг гаргасан байх. “Баясах трэйд” компани, спонсор байгууллага “Power nutrition sponsor”, гэр бүлийнхэн, “Бугат биж”, “Чийрэг монгол” клубийнхэн гээд олон хүн тусалсан.
-Бодигоор хичээллэхээс гадна ямар мэргэжилтэй вэ?
-Би ШУТИС-ийн барилгын менежментийн гуравдугаар курсийн оюутан. Хичээлийн зэрэгцээ миний гаргасан амжилт маань фитнессийн багшаас 100 хувь хамааралтай гэж боддог.
-Багшийгаа танилцуулна уу?
-Манай багшийг Б.Түвшинтогтох гэдэг. Бодибилдингээр хичээллээд 20 жил болж байгаа туршлагатай тамирчин.
-Цаашид ч энэ спортоороо хичээллэх үү?
-Энэ спортын давуу тал нь хүнийг их тэсвэр тэвчээртэй, дайчин зарчимч болгодог. Дээд үеийн ах, эгч нараа ч бас их хүндэлдэг шүү. Тиймээс цаашид ч хичээллэнэ гэж боддог. Ерөнхийдөө энэ спорт нэг талаасаа амьдралын зөв хэв маяг болдог ба хүний өдөр тутмын амьдралд дасгал хөдөлгөөн зайлшгүй хэрэгтэй шүү дээ.
-Найз залуутай юу. Найз залуутай бол энэ спортоор хичээллэхийг чинь юу гэж боддог вэ?
-Найз залуутай. Анх намайг тийм ч их дэмждэггүй байсан. Учир нь надад сайн багш байсангүй. Зүгээр л турахын түүс болж өөрийгөө их ядраадаг байсантай холбоотой. Одоо бол сайн багшийн удирдлагад бэлтгэл хийж байгаа болохоор ядарч, өлсч, өөрийгөө зовоодоггүй учраас ойлгож, маш сайн дэмждэг.
-Өөр ямар нэг авьяастай юу?
-Багадаа спортод их дуртай хүүхэд байсан. Ер нь янз бүрийн зүйл их сонирхдог байлаа. Нууц авьяас гэвэл бүжиглэх, битбокс бага зэрэг сонирхдог.
-Өөртөө хэр сэтгэл хангалуун байдаг вэ. Биеийнхээ аль хэсгийг хамгийн сайхан гэж үздэг вэ?
-Өөртөө сэтгэл маш хангалуун байдаг. Биеийн хамгийн дуртай хэсэг гэвэл бүсэлхийн зургаан булчин маань юм.
-Бэлтгэлээ ямар байдлаар хийдэг вэ. Булчингаа хөгжүүлэхийн тулд төмөр өргөх үү?
-Мэдээж. Төмөр өргөж байж л булчингаа хөгжүүлнэ. Тэмцээний бэлтгэлд орсон үед өглөө, орой хоёр удаа бэлтгэл хийдэг.
-Мэдээж хэрэг энгийн үеийнхээс илүү тэмцээний үеийн бэлтгэл хатуу байдаг болов уу?
-Нэг удаагийн бэлтгэлдээ хоёр цаг зарцуулдаг. Тэмцээний үед хоолны дэглэм маш сайн барьдаг учраас бага зэрэг хэцүү санагддаг.
-Долоо хоногт хэдэн удаа бэлтгэл хийх вэ?
-Долоон удаа.
-Гоё биетэй болохоор байгууллагууд рекламдаа тоглуулах санал тавьдаг уу?
-Шинэ залуу тамирчин болохоор одоо л хүмүүс намайг бага багаар таньж эхэлж байгаа гэж бодож байна. Хараахан ямар нэг байгууллагаас албан ёсны урилга хүлээж аваагүй ээ.
-Олон улсын тэмцээнд оролцоод Монголынхоо тамирчдыг гаднынхантай харьцуулж, өөрийн гэсэн дүгнэлт хийсэн байх. Монголын бодибилдинг фитнессийн тамирчид ер нь хэр санагдсан бэ?
-Манай хоёр эрэгтэй тамирчин олон жил хичээллэсэн болохоор тэднээс илүү санагдсан. Миний хувьд бол өөрийгөө их чамлаж байгаа. Булчингийн масс дээрээ улам сайн ажиллах хэрэгтэй харагдсан. Миний ганц давуу тал бол өөртөө маш их итгэлтэй байж чадсаных болов уу гэж бодож байгаа.
-Удахгүй болох “Монголын мистер 2015” тэмцээнд оролцох уу, өөртөө хэр итгэлтэй байна?
-Оролцоно. Монгол охид их сайн болохоор битүүхэндээ бас л ширүүн өрсөлдөөн болох болов уу гэж хүлээж байгаа.
-Өөрийгөө голж шантарсан үедээ хэрхэн урам авдаг вэ?
-Их шантраад байдаггүй. Бие минь гоё болох тусам л урам зориг ороод сайхан байдаг.
-Ярилцлагын маань төгсгөлд жингээ хасахыг хүссэн ч зориглож чаддаггүй бүсгүйчүүддээ хандаж юу гэж зөвлөмөөр байна вэ?
-Ихэнх бүсгүйчүүд маш амар аргаар жингээ хасахыг эрмэлздэг. Үүнд тураах кофе, цай, бэлдмэл уух гээд олон арга байдаг шүү дээ. Энэ бол маш муу арга бөгөөд эрсдэл ихтэй. Харин дасгал хөдөлгөөнөөр жингээ хасах юм бол шилдэг нь болно. Мөн зөв хооллохоос маш их зүйл хамаардаг гэдгийг хэлмээр байна. Үр дүнгээ хурдан үзье гэж бодож байвал сайн багшийг сонгоорой гэж хэлмээр байна. Мөн аливаа зүйлийг эхлэхээсээ өмнө бүү шантарч байгаарай, бүсгүйчүүд ээ.
Г.Нямсүрэн
Эх сурвалж: “Монголын үнэн” сонин
