Олны танил уран бүтээлчдээр хүрээгээ тэлж, нэг хэсэг телевизийн дэлгэцийг чимж байсан энэ бүсгүйг Г.Золцэцэг гэдэг боловч ихэнх хүмүүс Катя Зол нэрээр нь андахгүй биз. Малайзад загварын сургууль дүүргэсэн гэх тэрбээр гэртээ урласан гоёмсог хувцаснуудаа онлайнаар дамжуулж худалддаг байснаараа амжилтанд хүрсэн түүхтэй. Улмаар бие даасан загварын шоугаа зохион байгуулж, олонд танигдаад удаагүй байхдаа дизайнер Катя Зол эх орондоо ирж урлаг соёлынхонтой нөхөрлөх болсон билээ.
“Киви” хамтлагийн ахлагч Укатай хамтарч “UK fashion house” салон байгуулаад амжсан тэрбээр Малайз, Араб улсуудаар аялж шилдэг бүтээлүүдээ загварын шоугаар танилцуулаад ирсэн. Шаргал үс, эрлийз төрх, гоолиг бие, ухаалаг яриагаараа залуусын харцыг булаасан Катя Кол хувийн амьдралынхаа талаар тэгтлээ ам нээж байсан удаагүй. Түүний хувьд, хүсэл мөрөөдлийг нь цаг ямагт дэмждэг ээжээсээ өөр хэн нэгнийг дотночлон ярьж байгаагүй нь үнэн.
Харин дизайнер бүсгүй өмнө нь өөрөөсөө нэлээд хэдэн насаар ах Малайз эртэй ханилж, хөөрхөн хүүгийн ээж болсон гэдгийг хэвлэлийнхэн дэлгэсэн бөгөөд эцэст нь Катя Зол арга буюу үнэнээ хүлээсэн. Загвар зохион бүтээх, зураг авахуулах, цүнх цуглуулах хоббитой тэрбээр дотны найз Укатайгаа бараг зэрэг шахуу нөхөрт гарсан сурагтай. Тиймдээ ч олны хэл амнаас болгоомжлон харь оронд хоёр дахь амьдралаа зохиогоод байгаа Катя Зол эх орондоо үе үехэн ирээд буцдаг гэнэ шүү.
С.Цахиур