“Хас фильм”, Шүүдэр продакшны хамтын уран бүтээл “Галзуу зугаалга” УСК Тэнгис кино театрт 2016 оны 09 сарын 24-ны өдөр нээлтээ хийлээ. Нээлтэд киноны ерөнхий найруулагч Ц.Хүсэлбаатар, продюсер С.Өлзийхүү, Б.Шүүдэрцэцэг, нүүр будагч Ц.Ариунзаяа болон гол дүрийн залуу жүжигчид оролцов. Ингээд та бүхэндээ киноны уран бүтээлчдийн сэтгэгдлийг хуваалцая.
Ерөнхий продюсер С.Өлзийхүү: Манай кинонд шилдэг цаг үеийг байлдан дагуулж байгаа залуу жүжигчид оролцсон. Киног маань үзээд нэгийг ухаарна хэмээн бодож байна.
Гол дүрийн жүжигчин С.Сарнай: Би Мишээл хэмээх нэлээн ялдамхан бүсгүйн дүрийг бүтээсэн. Миний зан болоод байгаа байдал Мишээлээс тэс ондоо байсан ба энэ миний анхны кино юм. Ер нь жүжигчин хэмээх мэргэжил хэцүү гэдгийг ухаарсан ба авьяаслаг жүжигчидээ урд урдныхаасаа илүү хүндэлдэг болсон.
Гол дүрийн жүжигчин Э.Энхболд: Анхны киноны нээлт сайхан болж байна. Би эсрэг талын залуугийн дүрийг бүтээсэн. Киноны уран бүтээлчдийн үнэтэй зөвлөгөөг дагаж алдаатай оноотой сайн ажилласан гэж бодож байна.
Гол дүрийн жүжигчин Х.Намуун: Би Нарангарав хэмээх ангийн хамгийн ухаантай, даруухан, зөнч охины дүрийг бүтээсэн. Миний өмнө нь тоглосон гурван киноноос тэс өөр байсан. Надаас маш их ур чадвар шаардсан.
Гол дүрийн жүжигчин Б.Отгонтуяа: Энэ кино найз нөхөрлөлийн тухай өгүүлдэг. Найзууд дундаасаа арай эгчмэд хүн буюу Туул хэмээх бүсгүйн дүрд тоглосон. Би өмнө нь дандаа л инээдмийн кинонд тоглодог байсан. Харин энэ бол адал явдалтай кино юм. Дүрээ бүтээж байхад хүндрэлтэй маш их зүйл тохиолдсон. Гэхдээ одоо ингээд үзэх гэж буйдаа баяртай байна.
Ц.Соёл-Эрдэнэ
