Хэзээ ч төгсөшгүй ариун хайрын амьд домог болон амьдарч буй дуучин Селин Дионы ихэр хөвгүүд болох Эдди болон Нелсон нар зургаан нас хүрчээ. Дуучин эмэгтэй хөвгүүдийнхээ зургаан насны төрсөн өдрийг мартагдашгүй сайхнаар тэмдэглэхээр Диснейлэндийг зорьсон байна. Селин ихэр хөвгүүд болон том хүү 15 настай Рене-Чарлес нартайгаа амьдралынхаа мөч бүрийг сайхан дурсамж болгон үлдээхээр шийдсэн гэж ойрын эх сурвалж нь ярьсан байна.
Энэ төрсөн өдөр тэдний хайрт эцэг, хайрт хань Рене Анжелил улаан хоолойн хорт хавдраар өөд болсноос хойш есөн сарын дараа болж буй гэр бүлийн хамгийн чухал тэмдэглэлт баяр билээ.
Гурван хүүхдийн ээж 48 настай дуучин Селин эр нөхрөө алдсанаас хойш амьдралын утга учрыг илүүтэй ойлгох болсон гэж нэгэн ярилцлагандаа хэлсэн байдаг. Тиймдээ ч амь амьдралыг нь гэрэлтүүлж буй үр хүүхдэдээ цаг заваа зарцуулах ёстойг ухаарсан гэдэг. Ирэх 12-р сард Селин Дион уран бүтээлийн ажлаа хойшлуулж гурван хүүтэйгээ аялж зугаалах гэнэ.
И.МӨНХЦЭНГЭЛ
Эх сурвалж: www.zone.mn