Бидний амьдралд хөгжилтэй, дурсамжтай зүйлс зөндөө тохиолддог. Тэр дурсамжийг сануулах элдэв толбууд хувцсанд тань үлдсэн юм биш биз? Эсвэл толбо, бохирдлоос нь болоод дуртай даашинз, гоёлын хүрмээ өмсч чадахгүй явна уу? Хувцсан дээрх зарим толбыг хими цэвэрлэгээ ч арилгаж чадахгүй байх нь бий. Гэтэл гэрийн нөхцөлд толбыг арилгах энгийн аргууд бий. Юуны толбыг, хэрхэн арилгах талаарх эл зөвлөгөөг цаасан дээр бичиж, угаалгын өрөөнийхөө хананд наагаарай.
Дарсны толбо: Хувцасны шошгон дахь аюулгүйн заавартай танилцаарай. Хувцасны материалд аюулгүй, халуун бүлээн усанд угаалгын нунтаг хийж угаана. Толбыг илүү бэхжүүлэх магадлалтай байдаг тул савангаар угаах хэрэггүй.
Хоолны шөл, соусны толбо: Шинэхэн толбыг хатахаас өмнө алчууртаа шингээхээр арчаарай. Соус, шөл нь халуунд улам бэхждэг учир хүйтэн усанд угаагаарай. Хэрэв толбо арилахгүй байвал шингээгч ашиглан, дахин угааж болно. Хуучин толбо бол глицериний уусмалд 20 минут дэвтээсний дараа дээр хэлсэнчлэн угаах нь үр дүнтэй.
Зэвний толбо: Нимгэн бол лимоны шүүсээр арчихад бүрэн арилдаг. Харин дараа нь бүлээн индүүгээр дарж, усанд угаа. Эсвэл цагаан цуу ашиглаж болно. Цагаан цууны уусмалд бохирдсон хэсгийг дэвтээгээд, дараа нь цэвэр усаар угаана.
Жимсний толбо: Шинэхэн толбыг тэр даруй халуун усаар угаавал хурдан арилна. Харин хуучин толбыг нэг шилэн аяга усанд хоёр грамм /ойролцоогоор дөрвөн дусал/ нимбэгний хүчил хийгээд угаавал хялбархан арилна. Дараа нь бүлээн усаар угаагаарай. Мөн цэнхэр спиртийг бага зэрэг халааж арчдаг.
Шар айрагны толбо: Үдшийн даашинз, гоёлын хүрмэн дээрээ шар айраг дусаачих тохиолдол хааяагүй. Үүнийг тун хялбархан аргаар, ердөө л нэг грамм содны уусмалаар арилгадаг. Дараа нь сайн чанарын савангаар угааж цэвэрлээрэй. Толбо гүн биш бол цэнхэр спиртээр арчсан ч болно.
Тосны толбо: Ургамлын тосноос тогтсон толбыг арилгахдаа хүүхдийн цацалга ашиглана. Толботой хэсэг дээр цацалганаас жигд түрхэнэ. Дараа нь хүйтэн усанд сайтар үрсэний дараа бүлээн усаар угаагаарай. Мөн шинэ толбыг эхлээд уудаг цаасыг хэд давхарлан тавьж, бүлээн индүүгээр индүүднэ. Толботой хэсгийн доор мөн уудаг цаас тавихаа мартав аа. Бүрэн арилаагүй бол хөвөнд бага зэрэг бензин шингээж арчдаг. Эсвэл зориулалтын толбо арилгагчийг хэрэглэж болно.
Хөлсний толбыг арилгахдаа хувцсаа давс уусгасан саванд хийж дэвтээ.
