Нурууны гэмтэл хүн хүндэрч, тэргэнцэр дээр суудаг болсон аавыгаа хоёр хөл дээрээ босоосой хэмээн бодож, аавтайгаа хөтлөлцөөд алхахсан хэмээн мөрөөдөж, аавдаа итгэл урам өгч, сайн сайхныг хүсч зорьж яваа энэ бяцхан охиныг М.Ундрах гэдэг, тэр 11 настай. Тэгвэл, охины хүслээс сэдэвлэсэн “Аавуудын алхаа” нэртэй өдөрлөг саяхан Үндэсний цэцэрлэгт хүрээлэнд болж, аавынх нь найзууд болон сайн санаат хүмүүс түүнд туслан хандивын аян өрнүүлэхээр болоод байгаа гэсэн сайхан мэдээлэл дуулдсан. Ямартай ч охины хүсэл биелээсэй гэж хүсье. Нэг ч гэсэн монгол хүн хүнд өвчнөөс ангижирч, гэр бүлтэйгээ элэг бүтэн аз жаргалтай сайхан амьдраасай. Бяцхан охины нүд аз жаргалаар гэрэлтээсэй. Үүний төлөө монголчууд бүгдээрээ чин сэтгэлээсээ туслаасай. Монгол хүний сайхан сэтгэлийн гал унтаагүй, унтраагүй. Хүн болгоны зүрх сэтгэл сайн сайхны төлөө цохилж байгаа гэдэгт итгэж, бас найдаж, аав, охин хоёрыг дэмжээч хэмээн Polit.mn сайтаас уншигчиддаа хандан уриалж байна. Ингээд охины аав Б.Мөнх-Эрдэнэтэй цөөн хором ярилцсанаа хүргэж байна.
-Манай уншигчдад өөрийгөө танилцуулахгүй юу. Яаж яваад хүнд гэмтэв?
-Намайг Баатарын Мөнхсайхан гэдэг. Би нийслэлийн арван жилийн дугаар сургууль, “Цахим дээд сургуулийг тус тус төгссөн. Анх хувийн байшин барьж байгаад дээврийн ажлыг дуусч байхдаа унаж нуруундаа гэмтэл авсан юм.
-Гадаадад хагалгаанд ороход зардал нь өндөр гарсан гэсэн. Тэр тухайгаа ярихгүй юу?
-Солонгос руу явж нурууны хагалгаанд ороход 60-70 сая төгрөгийн зардал орохоор байгаа. Энэ боломжийг судлалгүй жаахан цаг алджээ. Одоогоор Солонгосын эмнэлгээс ирсэн хариу тухайн хүний биеийн байдлаас болж зардал нэмэгдэж болзошгүй гэсэн. Очиж шинжилгээ өгч, зураг авалтаа хийлгэсний дараа тодорхой болох байх. Зардлаас бага багаар цуглаад л байна. Хүмүүнлэгийн үйл ажиллагааг найзууд маань зохион байгуулж байгаа. Олон газраар арга хэмжээ зохион байгуулж явна гэж надад хэлсэн.
-Хагалгаа хийлгээд ямар боломжийг танд амлаж байна?
-Эмнэлгийн зүгээс намайг хөл дээрээ босох боломтжой, мэдрэлийн судас дарагдсан ч боломж бий гэсэн хариу өгсөн. Түүнийг дуулаад яаж ийгээд явья л гэж бодсон доо.
– “Аавуудын алхаа өдөрлөгт оролцсон сэтгэгдлээ хуваалцаач?
-Их сайхан арга хэмжээ болсон. “Аавуудын алхаа” өдөрлөгт оролцсон бүх хүнд талархал илэрхийлье. Гэр бүл, үр хүүхдүүддээ цаг гарган ирсэн тэр хүмүүст би үнэхээр их талархаж байна. Охин маань “Аавуудын алхаа” өдөрлөгт аавтайгаа хамт оролцмоор байна гэсэн санааг анх гаргаж, хамт оролцсон юм. Би хоёр жилийн өмнө гэмтэл авч суугаа болсон болохоор гэр бүлээрээ өдөрлөгт оролцъё гэхэд сэтгэл их хөдөлж хүлээж авсан. Охиноо баярлуулж, өдөрлөгт оролцож, олон хүнтэй мөр зэрэгцэн нэг өдөр хамт байсандаа баяртай байгаа.
-Парад алхахад та охинтойгоо хамт алхсан. Та хоёр юу ярьж явав?
– Цугласан олныг харж, төрсөн сэтгэгдлээ хуваалцаж явсан. Миний охин ч, би ч адилхан их баяртай байсан.
-Охин чинь аавдаа зориулж дуу дуулсан гэсэн. Тэгэхэд юу бодогдов?
-Охин минь аавдаа зориулж дуулахад урам зориг орсон. Сэтгэл их хөдөлсөн. Мөн миний арван ангийн найзууд ирж, сэтгэлийн үгээ хэлж урам нэмж, сайн сайхныг мэдрүүлсэн дээ.
М.Ундрах охины аав Б.Мөнх-Эрдэнэ ийнхүү ярьж байна. Уншигч та бүхэн түүнд туслахыг хүсвэл Хаан банк 5057131146, Төрийн банк 104800217019 дансанд хандаарай. Түүнтэй холбогдохыг хүсвэл: 91197911 дугаарт холбогдоорой.