Энэ жилийн “The Voice” шоуны дөрөв дэх улирлын шүүгчдээр дуучин Шакира болон Ашер нар сонгогдсон байна.
“Дуучин Шакира, Ашер хоёрыг нэвтрүүлгийнхээ шүүгчээр урихад саналыг минь таатай хүлээн авсанд баяртай байна” хэмээн NBC телевизийн Энтертайнмэнт хариуцсан дарга Роберт Гринблат хэлсэн байна.
34 настай нэрт R&B дуучин Ашерийн хувьд 2004 онд гаргасан “Confessions” цомгоо дэлхий даяар нийт 65 сая хувь борлуулж, долоон удаагийн Грэммигийн шагнал хүртэж байсан билээ.
Харин Колумб гаралтай 35 настай дуучин Шакира нь өөрийн цомгоо дэлхий даяар нийт 60 сая хувь борлуулж, хоёр удаагийн Грэммигийн шагнал болоод зургаан удаагийн Латин Грэммигийн шагналыг тус тус хүртсэн чадварлаг дуучин юм.
Өмнөх шүүгчид болох Кристина Агилера болон Си Ло Грин нар өөрсдийн уран бүтээлд анхаарлаа хандуулахаар шүүгчийн суудлыг нэвтрүүлгийн тавдугаар улирал хүртэл буюу түр орхисон байна.
Кристина Агилерагийн хувьд өнгөрөгч арваннэгдүгээр сард гаргасан “Лотус” цомгийнхоо аялан тоглолтыг хийх төлөвлөгөөтэй байгаа бол Си Логийн хувьд “Энэ удаагийн улирлыг би өнжихөөс өөр аргагүй боллоо. Учир нь миний шинэ уран бүтээлийг хүлээсэн шүтэн бишрэгчдээ хүндлэх хэрэгтэй байна” хэмээн тайлбарласан байна.
Харин Адам Лэвин (Maroon 5) болон Блэйк Шэлтон нар шүүгчийн суудалдаа хэвээрээ байх бөгөөд “The Voice” шоуны шинэ улирал энэ оны гуравдугаар сарын 25-нд эхлэх юм.
“The Voice” шоуны хувьд шүүгчид тайзны эсрэг тал руу харан сууж оролцогчдын гадаад байдлыг харалгүй зөвхөн тэдний дуу хоолойг сонсон үнэлгээ өгдөг нь X-Factor, American Idol хэмээх бусад шоунаас онцлог давуу талтай юм.
Б. Агиймаа /Эмэгтэйчүүд/
