Солонгос кинон дээр та жантай гоймонг бишгүй л харж, сонссон байх. Идэх юмсан гэсэн хүсэл их л төрдөг байсан бизээ. Одоо ч борооны мөөг шиг Солонгос хоолны газар олширсоор орж үзээгүй хүмүүс, идэж үзээгүй зүйлс тэрний хирээр ховордсон билээ. Тэр болгон Солонгос тогооч байгаад, яг хоолны үндсэн жороор нь хийж байгаа газар ч бас ховор байх. Тэрний хирээр Хятад Солонгос хоолны газруудын нэр хүнд ч одоо буурсан гэхэд болно. Мөнгө, цаг заваа үрж, зорьж очихоос илүү гэртээ элдэв хоол туршин хийж гэр бүл үр хүүхдээ бодож өөрийн гараар хоол бэлдэж өгөх хүсэлтэй эзэгтэй нар ч улам нэмэгджээ.
Тэгвэл танд яг Солонгос жорыг Солонгос сайтнаас хөрвүүлэн таньд хүргэж байна. Тэгэхдээ жантай гоймон нь Сологос хоол биш хятад гаралтай гэдгийг хэлэх нь зүйтэй болов уу. Амттай сайхан болно гэдэгт итгэж байна амжилт хүсье.
Жантай гоймон 4 хүний порц
Ашиглах материал
Гахайн мах 100гр, 2 ширхэг төмс, 2 ширхэг сонгино, бөөрөнхий байцаа 200гр, сармис, цагаан гаа, гоймон 4 хүнийхээр, лапша гоймонгоор хийж болно харин гоймонгоо хэт нялцайлгалгүй болгох нь чухал.
Нэмэлтээр хулуу, өргөст хэмх хийж амт нэмж болно.
Амтлагч бэлдэх
Ургамлын тос 50гр, хятад жан 100гр, сой соус 1,5 халбага, нунтаг цагаан гаа халбаганы 1/3, элсэн чихэр 2 халбага, давс халбаганы 1/3, крахмал 4 халбага+4 халбага ус /крахмалаа найруулна/.
Хийх арга
1. Гахайн мах,төмс,сонгино, байцаа, хулуу зэргээ бүгдийг нь дөрвөлжин хэрчинэ.
2. Өргөст хэмхээ нарийхан хэрчээд сармис цагаан гаагаа хэрчиж бэлдэнэ.
3. Хайруулын тавганд ургамлын тосоо хийн бага зэрэг халангуут нь жангаа хийж 5 минут орчим болгоод гаргана.
4. Хайруулын тавганд 3 халбага ургамлын тос хийн дунд зэргийн галд сармис, цагаан гаагаа эхэлж хуураад дээр нь гахайн махаа хийн хуурч төмс, сой соус, нунтаг цагаан гаагаа хийн хуурна.
5. Төмс бага зэрэг болоод ирэнгүүт нь хулуу, сонгино, байцаагаа хийн хуураад дээр нь жангаа хийн сайтайр хуурна.
6. 2 аяга ус хийн буцалгана.
7. Элсэн чихэр, давс, найруулсан крахмалаа хийн буцалгана.
8. Гоймонгоо буцалган хүйтэн усанд сойж усыг нь шүүн авч таваглан дээр нь бэлдсэн амтлагчаа хийн бэлэн болно.