Өдөр тутмын амьдрал чинь бусдынхаас ялгаатай, дутуу юм шиг мэдрэмж төрөх, бүх зүйл санаснаар болохгүй, үеийнхнээсээ өнгө үзэмж дутуу гээд л олон сөрөг мэдрэмж төрж байна уу?Ойрноос надад ийм бодол төрж, үүндээ ч урамшин өөрийгөө зоригжуулж байна. Хүүхнүүдийн ертөнцөд сайн, муу хов жив тасрана гэж үгүй. Чи хэн нэгний хувьд үнэ цэнэтэй, өө сэвгүй нэгэн байхад, өөр нэгний хувьд ертөнцөд ч баймгүй “ад зэтгэр” мэт сэтгэгдэл төрүүлнэ. Бидний үг, яриа үйлдэл гэрлийн хурдаар тархаж, сайхан муухайгийн төсөөллийг бие биедээ түгээж байдаг. Тиймээс өөрийнхөө болон өрөөл бусдын тухай муу үгийг бусаддаа бүү хэлж байгаарай. Чи өөртөө таалагддаггүй, сул талаа илүүтэй анхаарч, чадвар чадамжаа үнэлдэггүй байж болно.
Өдөр тутмын амьдрал чинь бусдынхаас ялгаатай, дутуу юм шиг мэдрэмж төрөх, бүх зүйл санаснаар болохгүй, үеийнхнээсээ өнгө үзэмж дутуу гээд л олон сөрөг мэдрэмж төрж байна уу? гэсэн ч энэ тухайгаа, энэ бодол сэтгэлээ хэнд ч бүү дэлгээрэй. Хамгийн сайн найз нөхөр, аав ээж ер нь өөрөөсөө ч нуух хэрэгтэй. Учир нь бид энэ амьдралд төгс байх гэж биш бодит байх гэж л төрсөн. Яахав дээ, өнөөдөр чи азгүйтэж, бүтэлгүйтэж болно. Энэ бол амьдралд байдаг бодит зүйл. Тиймээс та ухаалгаар бодит орчин нөхцлөө хүлээн зөвшөөрч, гарах гарцаа хайх хэрэгтэй. Бидний мэдрэмж төсөөлөл ихэнхдээ бодит нөхцлөөс хавьгүй их байдаг. Хэрээн чинээ асуудлыг бүргэдийн дайтай болгон томруулдаг цорын ганц зүйл бол мэдрэмж, бас өөрийнхөө тухай сөрөг бодол юм.
Тиймээс бүсгүйчүүдээ өөртөө муу бодол муу үг бүү хэлээрэй. Энэ тухай бусдад цухуйлгасны ч хэрэггүй. Учир нь бусдад дэлгэсэн ялимгүй гомдол чинь буцаад чам дээр хэд дахин үржиж ирдгийг санаарай. Үг үйлдэл мэдрэмж бол бодит зүйлээс хамаагүй том гэдгийг ахин сануулъя. Магадгүй олон арван бүсгүйчүүд чиний бодит амьдрал, бодит ертөнцөөс тэс өөр төсөөлөлтэй, чамайг огт өөрөөр бодож үнэлж явдаг ч байж болох юм шүү дээ. Нэг хүний өчүүхэн төдий алдааны тухай яриа олныг дамжин дамжсаар уул овоо шиг болж нэмэгдсээр “муу өөдгүй хүн” гэх хандлага мэдрэмжийг нийтэд төрүүлэх нь тийм ч таатай биш.
Яадаг юм, би өнөөдөр зарим нэгэн шиг хэдэн саяын үнэтэй машин унаж, хэд хэдэн өрөөтэй байранд амьдарч, хүүхдүүдээ өндөр төлбөртэй сургуульд сурган, брэндээр гангарах боломжгүй л байна. Амьдралын энэ хэрэгцээ шаардлага миний амьдралын бодит ертөнцөд бий болох цаг хараахан болоогүй л байна. Энэ олон хэрэглээ дутагдаж байгаа ертөнцдөө би өөрийнхөөрөө жаргалтай амьдарч, хүсэлдээ хүрэх гарц хайн амьдарч байна. Би бусад шиг бас хүн бүрт таалагдах төгс байхын тулд биш харин бодит ертөнцөд бодит амьдрах гэж л төрсөн. Таксины байтугай автобусны мөнгөггүй болсон ч, хөргөгч минь дундран хэтэвч халаас минь хоосорсон ч хувцас минь гандаж, зүс минь гундсан ч би би хэвээрээ л байх болно. Байхгүйгээ бий болгохын төлөө зүтгэх шиг аз жаргал хаа байх билээ дээ.
