Энэ үг сайхан сонсогдохгүй нь мэдээж. Чи хичээсэн боловч тэр чамд ингэж хэлээд орхиод явчихав. Гэвч өнгөрсөн явдлын хойноос гутарч гуниад яахав. Эцсийн эцэст чи чухам юунд харамсаад байгаагаа бодож үзсэн үү. Yнэхээр чи түүнд хайртай байсан гэж үү?
Чи түүнд зүгээр л дасчээ
Түүнтэй танилцахын өмнө амьдрал чинь дөлгөөн тайван байсан биз дээ?
Гэтэл нэгэн сайхан өдөр та хоёр учирчихаж… Аажмаар та хоёр хамтдаа байх болов. Чи түүнд амттай сайхан хоол хийж өгөх гэж янз бүрийн жор цуглуулна. Тэр ч байтугай хувцасныхаа өнгийг хүртэл түүний санаанд нийцүүлэн сонгоно. Yсээ засуулахдаа ийм хэв түүнд таалагдах болов уу гэж бодно. Гадагшаа гарсан ч хамтдаа явна. Yргэлж тэр хажууд чинь байсаар байгаад чи түүнд дасч орхижээ. Yүнийгээ хайр дурлал гэж ойлгох болж. Одоо түүнгүйгээр бүхэл амьдрал чинь утгагүй уйтгартай мэт санагдаж, хойноос нь гүйгээд очмоор бодогдох вий? Хүн дассан зуршлаасаа салж чаддаггүй нь үнэн. Тиймээс хэн нэгнээс холдох нь юуны өмнө ямар нэгэн дадсан заншлаа өөрчлөх болно гэсэн үг. Ямар ч хүнд зуршлаа орхиход хэцүү байдаг. Гэхдээ нэг зүйлийг санахад илүүдэхгүй. Чи нас залуу байна. Амьдралдаа дахиад хэн нэгэнтэй учрах болно. Харин тэр үед өмнөх амьдралынхаа сургамжийг мартсаны хэрэггүй. Хайр дурлал, хэн нэгэнд дасдаг хүний араншин хоёрыг хооронд нь ялган ойлгож сайтар тунгаагаарай.
Сексийн амьдрал чинь «амттай» байв уу?
Дотнын хүнтэйгээ муудалцсаны дараа чи хэрэгтэй хэрэггүй зүйлээс болж үргэлж уурлаж, бухимдаж байна уу. Тэр ч байтугай, сарын тэмдэг дөхөөд ирэхээрээ хэнд ч хамаагүй уурлаж, толгойн дундуур нь цохиод авмаар санагдаж байж болзошгүй. Yүлэн борооны явдлыг харуулсан кино үзэхээрээ ямар нэгэн далдын гунигт автаад л байж суух газраа олж ядаад байж болзошгүй. Энэ үед «Би чамайг хайрлах албагүй» гэж хэлээд явчихсан нөгөө эрхмийг өөрийн эрхгүй санана. Зарим сайхан сэтгэлт найзууддаа чи энэ тухай ярина. Тэд чамд «секс»-ийн амьдрал дутагдаж байна гэж зөвлөж, тэр ч байтугай хүнтэй танилцуулах гэж гүйж магадгүй. Чи санамсаргүй сексийн харилцаанд дахиад оровч хуучин амрагаа эргээд санагалзах болно. Шинээр танилцсан хүний чинь «секс» таалагдаагүй юм шиг бодогдоно. Энэ нь ердөө утгагүй зүйл гэдгийг анхаараарай. Хайр сэтгэл хийгээд удам угсаагаа үлдээхэд «секс» зайлшгүй хэрэгтэй нь үнэн боловч хүн сексийг амьдралынхаа гол зорилго болгохоосоо илүү энэ явдлыг зугаа цэнгэл, амтат мэдрэмжийн хэмжээнд тавьж ирсэнийг санахад илүүдэхгүй.
Адгуус хүртэл секст шунан тэмүүлдэг. Харин хүн энэ тэмүүлэлийг эртнээс нааш оюун ухаанаараа зохицуулж иржээ. Тийм болохоор хаана ч байдаг жирийн нэг залууг секс төдийхний төлөө бодоод байсны хэрэггүй.
Тооцоо
Чи түүнтэй муудсанаас болоод явган алхдаг болов уу. Хайртай залуугынхаа ганган машинд суухаа бүр больжээ. Бас зөвхөн өөрийнхөө цалингаар амьдрах болсон чинь уурыг чинь бүр их хүргэж байгаа биз? Yүнээс өмнө хэн нэгэн чамд санхүүгийн дэмжлэг үзүүлж, шохоорхсон даашинз, гоо сайхны бүтээгдэхүүнээ авах боломж олгож байжээ. Гэвч үүнийг март. Эцсийн эцэст тэр чамд зөвхөн амьдралынхаа материаллаг талыг бэхжүүлэхэд хэрэг болж байсан юм гэж үү. Хэрэв тийм бол түүнийг мартаж орхи. Санхүүгийн нарийн тооцоон дээр тогтсон харилцаа хүнд жаргал авчирсан удаагүй. Тэрнээс илүү чинээлэг, баян хүн амьдралд чинь тааралдана гэдэгт итгээрэй.
Уйтгартай байна уу
Чи түүнтэй хоёр тийшээ болсноос хойш амьдрал чинь жигтэйхэн уйтгартай байгаа мэт санагдаж байж болно. Хэн нэгэн амралтын өдрүүдээр чамайг урихгүй. Хотоос гадагш хамтдаа гарах хүнгүй, оройдоо өдрийн болсон явдлаа ч хэн нэгэнд ярих боломжгүй ганцаараа дуугүй суугаад байх нь үнэхээр уйтгартай. Найз нөхдийнхөө төрсөн өдөрт очоод бүжиглэх ч хүнгүй байна гэж бодохоос гунигтай байгаа биз? Зүгээр ээ, дажгүй. Хүний залуу насыг яруу найрагчид романтик сэтгэлээр «үүлэн чөлөөний нартай адил үзэгдээд өнгөрөх зүйл» хэмээн хэлдэг. Дурлал ч ялгаагүй үүлэн чөлөөний нар шиг өнгөрөх нь байдаг. Гэвч хэсэг хугацаа өнгөрсөний дараа дахиад чи хайр дурлалтай учирна гэдэгт итгэ. Би хайртай хүнээ алдлаа одоо яах вэ гээд гуниглаад суусны хэрэггүй. Тэр ч байтугай тамхи татаж, дарс ууж тайтгарна гэдэг бүр тэнэг зүйл. Маргаашийн өдөр гэж байдгийг сана. Өглөө бүр цэлмэг тэнгэрт нар манддаг шүү дээ. Тэр «би чамайг хайрлах албагүй» гэж хэлсэн үү? Тэгвэл чи ч бас түүнийг хайрлах албагүй шүү дээ.
Атаархал
Түүнийг явсны дараа нүүрээ дэрэндээ наагаад уйлж гарав уу, дэмий юм хийж дээ. Харин уйлахаа болиод дотнын хүнийг чинь булаан авсан тэр хүүхэн ямар халамжтай, дур булаам сайхан эмэгтэй вэ гэдгээ түүнд харуулахын тулд «шидийг» үзүүлж байгааг санаарай. Тэр хүүхэн хэзээ нэгэн цагт чиний анд найз чинь ч байсан байж магадгүй. Ингэж бодохоос чиний атаархал төрж байгаа биз?
Бусдын амжилтад жөтөөрхөх нь олигтой зүйл биш гэдгийг санаарай. Хүнд уурлаж, атаархахын оронд сэтгэлээ барьж, амьдралд чинь тохиолдсон таагүй явдлыг хэрхэн даван туулах вэ гэдэгт анхаарлаа төвлөрүүл. Аливааг сайтар эргэцүүлэн бодох нь хүнд зөв шийдвэр гаргахад тусладаг. Атаа жөтөө бол хүүхнүүдийн сул тал гэж ихэнх эрчүүд дүгнэдгийг бас санаарай.
Ганцаардлын айдас
Хонгор найз чинь чамайг орхиод явсан тэр өдөр тэнгэр цэлмэг байгаагүй нь мэдээж. Тэр ч байтугай, нөхөр, хүүхэд ч үгүй, хайр дурлалгүй ирээдүй хүлээж байна гэсэн бодол нөмөрч, айдас төрүүлсэн байж болно.
Ганц бие, ааш гэж адсага хөгшчүүл нүдний чинь өмнө харагдаад санааг чинь зовоож байж магадгүй. Сэтгэл зовсоны хэрэггүй. Эрчүүд хаанаас ч олдоно. Хамгийн гол нь чи өөртөө итгэлтэй, хэнээс хамааралгүй амьдарч сур. Орчлон хорвоод хүн болж төрсөн чинь хамгийн том баяр баясгалан гэдгийг мартуузай. Ганцаардалд орох эсэх нь зөвхөн өөрөөс чинь шалтгаална.