Удахгүй шинэ жил болох гээд бүсгүйчүүд хэрхэн гоёх талаар аль хэдийнэ санаа зовоод эхэлжээ.
Бидний хамгийн их ач холбогдол өгөн тэмдэглэдэг энэхүү баярыг хүмүүс сүүлийн жилүүдэд улам ч сонгодог, тансаг тэмдэглэдэг болсон. Бүсгүйчүүд ч энэхүү баяраар хамгийн онцгой харагдахыг хүсдэг нь нууц биш ээ. Энэ жилийн даашинзны загварын чиг хандлага ерөнхийдөө биеийн галбир харагдуулсан урт хормойтойг санал болгож байна. Өндөр өсгийт өмсч, урт бие барьсан даашинз илүү дутуу зүйлгүй ихэмсэг харагдуулна.
Мөн энэ жил цээжээрээ ямар нэг илүү чимэглэлгүй, мөргүй байх тусмаа чамин харагдах юм. Эмэгтэйчүүд ядартлаа дэлгүүр хэсэхээс илүүтэйгээр өөртөө таалагдсан загварынхаа дагуу даашинзаа оёулах нь элбэг болсон. Өөрийн биеийн хэмжээ, онцлогт тохируулан хүссэн цорын ганц гоёлоор гоёх нь илүү их үнэ цэнэтэй болоод буй.
Харин эмэгтэй та даашинздаа тохируулан ээмэг, зүүлтнийхээ сонголтод ч бас анхаараарай.
Хэт өндөр биш өсгийтэй туфль сонгоорой
Даашинзны дараа орох хамгийн чухал гоёл бол туфль. Ойрын жилүүдэд өргөн өсгий, бөөрөнхий хоншоортой гутал, туфлийг охид бүсгүйчүүд илүүд үзэх болсныг уншигч та санаж байгаа байх. Энэ жил ч ялгаагүй. Гэхдээ заавал моод дагах албагүй шүү дээ. Өөрт таалагдсан, зохисон туфлиэ л сонгосон нь дээр. Хамгийн гол нь сонгосон туфль чинь хэт өндөр биш өсгийтэй байвал зүгээр. Яагаад гэвэл, өндөр өсгийтэй гутал, туфль дээр явж чадахгүй, хөл нь өвдгөөрөө нугараад байвал мэдээж гоё харагдахгүй. Тэгээд ч зохихгүй гоёл хүнийг гутаадаг шүү дээ.
Сувдан шигтгээтэй зүүлт зонхилно
Эмэгтэй хүний хамгийн чухал гоёлын тоонд яах аргагүй ээмэг, бөгж, хүзүүний зүүлт, хавчаар зэрэг орно. Та шинэ жилийн үдэш зүүх гоёлоо хараахан худалдан аваагүй байгаа бол түр хүлээгээрэй. Өнгөрсөн жил жижиг шигтгээтэй мөнгөлөг өнгийн ээмэг, бөгж эрэлт хэрэгцээ ихтэй байсан бол энэ жил хэмжээ нь жаахан томорчээ. Сувдан шигтгээтэй хэт том биш, бас жижиг ч биш гоёлын зүүлтийг гаp, хөлийнх нь гинжтэй хослуулж зүүгээрэй.
Харин алт, монет зэрэг үнэт эдлэл нь шинэ жилийн ёслолын арга хэмжээн дээр тийм ч сайхан харагддаггүй аж. Учир нь, таныг нас тогтсон мэт оворжуу харагдуулах болно. Нүүрний будалтын хувьд ерөнхийдөө тод биш байх гэнэ. Харин нүд, уруулаа л тод өнгөөр уусгаж будахыг гоо сайханчид зөвлөж байна. Хэрэв та хүсвэл авангард загварын будалт ч хийлгэж болох юм байна.
Энгийн засалттай үс сайхан харагдуулна
Монголчууд үс сайхан бол зүс сайхан гэж ярьдаг шүү дээ. Энэ яах аргагүй үнэн үг юм. Та шинэ жилийн үдэш өмсөх гоёлын даашинз, туфль, ээмэг, зүүлтээ бэлтгэчихсэн ч үсээ яаж засуулах талаараа бодолцож үзсэн үү. Нэгэн үе охид, бүсгүйчүүд маань шинэ жил, хонхны баяр болохоор л үсээ шуулган гоёлын засалт хийлгэдэг байснаасаа уйдаж, энгийн чөлөөтэй, сул тавьдаг болсон. Хамгийн гол нь өмссөн даашинз, нүүр царайныхаа хэлбэр, будалтдаа тохируулаад үсээ янзлуулаарай. Хэт хурц өнгөөр будаж лакдахаас аль болох зайлсхийх хэрэгтэй. Үсээ хэтэрхий олон өнгөөр эрээлж, элдэв янзын хэлбэр дүрсэнд оруулснаар та шинэхэн загварын даашинзаа гундааж мэднэ. Тиймээс аль болох өөртөө зохисон хэв загвараар засуулж, байгалиас заяасан гоо сайхнаа тодотгохыг зориорой.
Чамин жижиг гар цүнхийг туфлийнхээ өнгөтэй хослуулаарай
Мэдээж даашинзтайгаа хослуулан гар цүнх, туфлиэ сонговол илүү чамин, дэгжин харагдана.
Гар цүнх чинь урт, богино ямар ч оосортой байж болно. Хамгийн гол жижиг байх тусмаа эвтэйхэн. Сүүлийн үед охид, бүсгүйчүүд шүр, сувдаар хэлхэж хийсэн гоёлын цүнхийг илүүд үзэх болсон байна билээ.
Д.Биндэръяа, Б.Дэлгэрцэцэг
ЭХ СУРВАЛЖ: НИЙСЛЭЛ ТАЙМС СОНИН