Солонгосын томоохон зах зээлийг эзэлдэг Hanjin группын захирал Чо Янг Хогийн охин Хитер Чо самарнаас болж нислэг хойшлуулсан хэрэг гарч байсан билээ. Тодруулбал Нью-Йоркоос Сөүл рүү нисэх гэж байхдаа онгоцны үйлчлэгчийг өөрт нь зохих ёсоор үйлчилсэнгүй хэмээн зэмлэж, даруйхан халахыг шаардсанаас хөөрөх зурвас руу явж байсан онгоц буцаад гарц руугаа эргэж явахад хүрсэн аж.
Хитер чо нь Korean Air-ын дэд ерөнхийлөгчөөр ажилладаг бөгөөд түүний аав Чо Янг Хо нь Korean Air болон Hanjin группуудыг удирддаг бизнесмен хүн юм байна.
Хитер Чогийн гаргасан эл үйлдэлд түүний аав охиноо буруу хүмүүжүүлсэнийхээ төлөө уучлал гуйж байсан билээ. Ямартаа ч Нислэгийн аюулгүй байдалд нөлөөлж, хууль дүрэм зөрчсөн дөрвөн шалтгаанаар Чод нийт 15 жилийн хорих ял төлөвлөж байна.
Хамгийн ноцтой нь онгоцыг нислэгийн замаас гаргасан хэрэг бөгөөд үүнд 10 жил оноох гэнэ. Бусад нь нислэгийн багийнханд хүч хэрэглэсэн, мөрдлөгт саад хийх гэж оролдсон, үйлчлэгчийг онгоцноос буулгахад хүргэсэн хэргүүд юм. Эдгээрт нь таван жилийн ял ноогдож байгаа ажээ.